Üna chüra sgüra
STRUcTURA DA DI

Ils pasts a la maisa da mezdi vegnan preparos svess, fras-chs e cun bger amur minchadi. Sper üna persuna da chüra collavurescha mincha vouta eir üna persuna d‘instrucziun da la scoula düraunt la posa da mezdi i’l provedimaint. Persunas da chüra, persunas d‘instrucziun scu eir scolaras e scolars da la scoulina fin la 6. classa predschan l‘esser insembel agreabel a mezdi e que regna ün’atmosfera allegra. Düraunt ils ultims ans pudaivans nus ingrandir cuntinuedamaing la spüerta. Intaunt passainta la granda part da las scolaras ed ils scolars almain üna vouta il mezdi illa scoula. Eir a la maisa da mezdi mettains nus grand pais sün rituels e structuras. L‘andamaint düraunt il mezdi es uschè adüna structuro in möd sumgiaint ed ils iffaunts evadan lavurettas scu scuer il fuonz, pulir las maisas u metter maisa.

La structura da di spordscha pussibiliteds da chüra per las scolaras ed ils scolars zieva las lecziuns da scoula. Tuot tenor bsögn vain alura creeda üna spüerta. Las scolaras ed ils scolars haun la pussibilited dad evader lur lezchas, da giuver u eir da fer qualchos‘oter düraunt la chüra.

L‘annunzcha per la maisa da mezdi e la structura da di ho lö mincha vouta per la fin da l‘an da scoula per l’an da scoula chi segua. L‘annunzcha es impegnativa per ün an. Eir düraunt l’an paun gnir annunzchos scolaras e scolars, a cundiziun cha nus disponins dad avuonda plazza. Ils genituors paun contacter directamaing la mnedra da scoula.

Scha‘ls genituors vessan dad avair bsögn da chüra a cuorta vista, paun Els annunzcher Lur iffaunt il di aunz tar la mnedra da scoula via KLAPP a cundiziun cha nus disponins dad avuonda plazza.

Iffaunts interessos paun gugent eir fer ün di da prouva ouravaunt, da maniera ch‘els clappan ün‘invista e paun fer la cugnuschentscha da las structuras. Tar bsögn as paun Els eir annunzcher tar la mnedra da scoula.

Ils cuosts per la maisa da mezdi (damanger incl. chüra) importan CHF 9.– per mezdi. Per ün‘ura da chüra cuosta que CHF 3.– per ura.