Valuors
scolasticas
Cò chattan Els nossas valuors davart tenuta d’instrucziun, cultura da scoula, direcziun da scoula e management da qualited. Landrour as ho sviluppeda ün‘infografica, chi muossa scu cha nossas valuors as cumbinan. Que drouva mincha valur, per s-chaffir il meglder champ d’imprender.
In nos model directiv definins nus nossas valuors davart tenuta d‘instrucziun, cultura da scoula, direcziun da scoula e management da qualited. Landrour s’ho sviluppeda üna visiun, chi demuossa, scu cha nossas valuors faun effet. Que drouva mincha valur, per s-chaffir il meglder champ d’imprender.
NOSSA VISIUN ES, CHA’LS IFFAUNTS STRUCTURESCHAN LUR EGEN IMPRENDER VIEPÜ SVESS, E SAUN INUA CHA SUN LUR FERMEZZAS E LUR POTENZIELS, MA EIR, INUA CH’ELS STÖGLIAN TRENER DAPÜ IN MÖD MIRO.
Lotiers ans es que fich important cha rituels regulers ed occurenzas chi’s repetan minch’an sun puncts fixs aint il minchadi scolastic. Quists daun als iffaunts sustegn e sgürezza ed al listess mumaint rinforzan els il spiert da cumünaunza.
rituels
L’instrucziun cumainza pelpü las 08:20. Per tuot las scolaras ed ils scolars da la scoulina fin la 6evla classa sun las portas già aviertas a las 07:30. Que es l’uschedit temp d’entreda chi güda als iffaunts per river in scoula e per as preparer per il di chi cumainza. Las scolaras ed ils scolars paun profiter da quel temp per fer lavuors individuelas, lavuors quietas, discuorrer culla persuna d’instrucziun, fer correcturas etc.
Adüna in lündeschdi bunura cumainzan tuot ils iffaunts da la scoulina fin a la 6evla classa insembel l’eivna. Lo tiers chauntan tuots insembel üna chanzun. Quist rituel s-chaffescha ün sentimaint cumünaivel e collia.
In nossa scoula es que important cha eir las vuschs dals iffaunts vegnan udidas e cha las scolaras ed ils scolars paun parteciper. Our da quist motiv ho lö üna vouta al quintal il cussagl d’iffaunts. Tuot las scolaras ed ils scolars da la scoulina fin a la 6evla classa s’inscuntran per que illa sela da gimnastica. Il cussagl d’iffaunts vain modero da duos iffaunts. Il protocol fo eir üna scolara resp. ün scolar. Tractandas paun propuoner ils iffaunts ma eir la magistralia.
Üna lecziun da musica ho lö per tuot las scolaras ed ils scolars da la scoula primara cumünaivelmaing. Quista lecziun es la lecziun da cor. Insembel vegnan exercitedas chanzuns chi vegnan preschantedas ad evenimaints da scoula. Il chanter cun iffaunts da differenta eted rinforza l‘uniun. Impü do que dapü pussibiliteds scu chanter in gruppas pitschnas (p.ex. chanter cun püssas vuschs).
evenimaints chi’s repetan
Traunter las vacanzas da sted ed utuon ho lö la prüma excursiun. Ils iffaunts passaintan ün di i’l liber culla magistraglia. Il böt da la gita vain adüna vario e que vegnan eir adüna resguardedas l’ora e las temperaturas. Per part chaminan tuot ils iffaunts insembel il listess traget ma minchataunt faun las scolaras ed ils scolars pü vegls üna distanza pü granda ed as inscuntran alura darcho tuots per la posa da mezdi.
L’Engiadina es il center per glieud chi es fascineda dal sport. Uschè vulessans eir nus promouver il plaschair ed il muvimaint tar las scolaras ed ils scolars. Da sted e d’inviern ho lö ün’olimpiada da sport. Ils iffaunts cumpettan in differentas disciplinas e categorias d’eted. Las disciplinas sun fich multifaras uschè cha que es üna concurrenza polisportiva chi dess allegrer ed inchanter ils iffaunts. Intaunt cha l’olimpiada da sted ho lö düraunt üna bunura, ho lö l’olimpiada d’inviern düraunt differents mezs dis d’inviern.
Il Chalandamarz es üna veglia tradiziun da l’Engiadina. Il punct centrel da quista tradiziun es l’Uorsin da la s-chella. Il prüm di dal mais da marz vain s-chatscho l’inviern cun sieus noschs spierts cun s-cheller e cun chaunt.
Il Chalandamarz da La Punt Chamues-ch ho lö ils 1. marz. Es il 1. marz üna dumengia, vain spusto il cortegi sülla sanda aunz ils 1. marz. La bunura dal di zieva il cortegi nun es üngüna scoula. Il Chalandamarz vela per tuot las scolaras ed ils scolars da la scoula primara scu di da scoula ufficiel ed es uschè obligatoric. Iffaunts da scoulina paun voluntariamaing esser tiers uschè lönch scu ch’els vöglian. Il cortegi cumainza las 06:00 sün Plaz a Chamues-ch. Marendas uschè scu eir il gianter vegnan mangios cumünaivelmaing e sun organisos.
Düraunt tuot il di portan las scolaras ed ils scolars blusas blovas e chapütschas cotschnas. Sülla chapütscha stöglian esser 5 rösas da La Punt our da palperi da saida. Mincha mat ho cun se üna s-chella da vacha e las mattas haun üna brunzina. Quistas paun gnir imprastedas da purs aint il cumün scha s’organisescha bod avuonda. Per l’organisaziun sun respunsabels las scolaras ed ils scolars resp. ils genituors.
Il Balin ho lö la prüma dumengia zieva il cortegi. Quista festa vain accumpagneda dad ün teater da las scolaras e scolars, musica e sot. Il Balin cumainza las 17:00 e glivra las 23:00.
Per fer las rösas sun respunsabels ils iffaunts e lur genituors. La magistraglia spordscha aunz il Chalandamarz ad üna saira ün’introducziun per zambrager rösas. La partecipaziun es voluntaria. Suot chattan Els ün video cun ün inviamaint.
Il Bös-chin es la festa da Nadel da la scoula. Normelmaing ho quist evenimaint lö üna saira ill’ ultim’ eivna aunz las vacanzas da Nadel. Ils iffaunts preparan in lur classas qualchosa chi vain alura preschanto als genituors. L’evenimaint ho lö normelmaing aint il liber.
Insembel culs genituors e tuot las scolaras ed ils scolars glivrains il vegl an in ün’atmosfera paschaivla e pachifica.
