Imprender insembel
Scuola
La scoula La Punt Chamues-ch es üna scoula cumünela pitschna, innovativa e bilingua. Ella cumpiglia üna gruppa da gö, üna scoulina ed eir trais classas primaras.
Las classas primaras vegnan mnedas scu classas cun iffaunts da differentas eteds. Tres la grandezza famigliera do que ün stret sentimaint da solidarited ed ün spiert da cumünaunza marcant chi collia tuot ils iffaunts. L’instrucziun es varieda e vain orienteda als bsögns individuels dals iffaunts. Mincha iffaunt po svilupper sieu potenziel e vain promoss in möd optimel. La magistraglia accumpagna e sustegna ils iffaunts, refletta cun els lur process d’imprender ed ils iffaunts surpiglian pass per pass dapü autorespunsabilited per l’egen imprender.
La magistraglia da classa, da ram e sustegn percepischa la promoziun individuela da tuot las scolaras e scolars scu lezcha cumünaivla, sun in barat culs genituors e creeschan ün setting il pü optimel pussibel.
Las Seguaintas spüertas da sustegn staun a disposiziun:
In mincha classa ho üna magistra da promoziun la lezcha da la promoziun integrativa. Quistas lecziuns servan a tuot la classa e surpiglian üna funcziun preventiva. Tuot ils iffaunts profiteschan da listessa maniera da quelo e vegnan promoss tenor lur fermezzas e deblezzas. La magistraglia da classa e las magistras da promoziun decidan tenor l’instrucziun ed ils bsögns da la classa, cu ch’ella vain applicheda.
Tar ün promoziun cun u sainza böts d’imprender individuels in rams definieus clappa ün iffaunt resursas supplementaras dad üna magistra da promoziun. In quistas lecziuns es il focus precis süls bsögns individuels ed il nivel d’imprender da la scolara u dal scolar. La magistraglia da promoziun po lavurer cun l’iffaunt sulet, in gruppas pitschnas u in classa. Tar üna promoziun cun böts d’imprender individuels vegnan notos ils böts in üna planisaziun da promoziun. L’iffaunt clappa sper l’attestat eir ün rapport d’imprender.
Iffaunts da lingua estra chi nu discuorran üngün tudas-ch e/u rumauntsch survegnan già al cumanzamaint da la scoulina üna promoziun per iffaunts da lingua estra. La promoziun per iffaunts da lingua estra ho lö in möd immersiv e vain realiseda dad üna magistra da scoulina. A partir da la 1. classa clappan ils iffaunts lecziuns supplementaras da promoziun per iffaunts da lingua estra chi paun avair lö parallelamaing a l’instrucziun da classa normela u ulteriurmaing düraunt ün urari marginel.
Imprender capita üna vita intera! Perque vzains nus que scu lezcha da refletter l’egna pratcha constantamaing. Nus pratichains ün svilup activ da la scoula e l’instrucziun.
Aint il focus da la scoula nun es be l’imprender: Bger dapü dess gnir creo ün lö da viver aint in quêl ils iffaunts passaintan gugent lur temp. La structura da di e spüertas da sport e da temp liber voluntarias scu eir la partecipaziun ad occurenzas dal cumün cumpletteschan l’instrucziun. La collavuraziun es lotiers da granda importanza. La partecipaziun culs genituors scu eir cullas scolaras ed ils scolars ho üna granda valur. Zieva la finischun dal temp da scoula primara vaun las scolaras ed ils scolars i’l s-chelin ot a Zuoz.
