Partenza aint la vita da scoula
Scuola Publica
Il temp obligatoric da la scoula publica es structuro in duos ans da scoulina e ses ans da scoula primara.
Cun l‘entreda illa scoulina cumainza per ils iffaunts il temp obligatoric da scoula publica. Üna nouva fasa da la vita – chi cumainza tenor l’anneda da l’iffaunt aint l’an in quêl Vos iffaunt festagia sieu tschinchevel anniversari. Als iffaunts as evra ün spazi da gö ed experienza chi als maina in ün ambiaint sociel pü vast cun nouvas lezchas e sfidas.
L’eterogenitẹd dals iffaunts inscuntrains nus cun ün‘offerta stimulanta e varieda. Uschè laschains nus svilupper il potenziel dals iffaunts aint il meglder möd pussibel. L’imprender succeda giuvand: imprender e giuver vegnan percepieus scu united. Ils iffaunts sun viepü capabels, da drizzer lur attenziun eir sün cuntgnieus prescrits da l‘exteriur.
L’instrucziun illa scoulina ho lö in rumauntsch e tudas-ch, la part rumauntscha es cleramaing pü granda. L’instrucziun es structureda e ritualiseda bain. Ella cuntegna sequenzas tematicas e mnedas aint il rinch e lavuors cun ufficinas scu eir fasas da gö liber. La magistraglia da scoulina accumpagna e sustegna ils iffaunts da scoulina cun affecziun e bgera empatia. In basa ad observaziuns e discuors creeschan las magistras ambiaints d‘imprender concrets chi stimuleschan ils prossems pass da svilup. L‘instrucziun succeda tenor il plan d‘instrucziun 21 e promouva importantas abiliteds primaras linguisticas scu eir matematicas, chi sun importantas per la scoula primara
Organisaziun da l‘instrucziun
La scoulina as rechatta in ün oter edifizi sül listess areal scu la scoula. Ils iffaunts passaintan la posa insembel cullas scolaras ed ils scolars da la scoula primara sülla plazza da posa.
Tuot ils iffaunts da la scoulina haun instrucziun da lündeschdi fin venderdi da las 8:20 fin las 11:55. Ils iffaunts dal 1. an da scoulina haun instrucziun ün zievamezdi, quels dal 2. an duos zievamezdis da las 13:30 fin las 15:30.
Actuelmeing instrueschan duos persunas d’instrucziun per la scoulina in scoulina – ün di insembel. Pels iffaunts, chi haun tudas-ch e/u rumauntsch scu lingua estra, ho lö la promoziun da lingua integreda aint il minchadi da la scoulina. Sper la magistraglia da scoulina lavura minch’eivna duos voutas per duos lecziuns üna persuna d’instrucziun per la promoziun integrativa in scoulina.
Chüra düraunt il temp sainza instrucziun
Las spüertas da la structura dal di staun a disposiziun als iffaunts a partir da la scoulina
In scoula primara vegnan mnedas las classas da 1.-2., da 3. e 4.-6. in classas cun iffaunts da differenta eted. Già in scoulina es l’instrucziun bilingua, la part tudas-cha crescha cuntinuedamaing fin in 6. classa. Las scolaras ed ils scolars haun a partir da la 1. classa rumauntsch e tudas-ch scu instrucziun linguistica. Illa 5. classa cumainza cun l’inglais la prüma lingua estra.
Sper a las cumpetenzas dal ram mettains nus granda valur süllas cumpetenzas transverselas. Las scolaras e scolars imprendan a surpiglier respunsabilited per lur imprender, lavurer in möd autonom ed a planiser e refletter lur procedura.
L’instrucziun segua üna didactica da la diversited, chi renda quint a l’eterogenited dals iffaunts. Las scolaras ed ils scolars lavuran a böts individuels, vegnan accumpagnos e sustgnieus da las persunas d’instrucziun e reflettan il process d’imprender e lavur. L’imprender ho lö ün da l’oter iffaunt ed insembel: tar que staun aint il center ils bsögns individuels insembel cun l’imprender vi da la chosa e la comunited. Umur, fiduzcha e transparenza creeschan la basa per ün bun clima d’imprender e lavurer.
L’imprender in classas cun iffaunts da differentas eteds pussibilitescha da metter il focus sur ils cunfins da la classa als bsögns e potenziels individuels, che chi garantescha üna promoziun optimela.
Organisaziun da l‘instrucziun
Las uras da bloc in scoula sun da las 08:20 fin las 11:55. Tuot las classas haun liber il marculdi zievamezdi. La 1. e 2. classa ho liber ün zievamezdi da l’eivna impü.
Las persunas d‘instrucziun lavuran in möd stret culla pedagoga curativa da scoula. Insembel erueschan ellas ils differents bsögns da las classas ed iffaunts e sviluppan situaziuns adattedas per la promoziun, saja que üna situaziun singula, da gruppa u da classa.
